Ba Khuda Hakima-e-Kon-o-Makaan Hain Zahra
Dehn-e-Aayat Mein Quraan Ki Zubaan Hain Zahra
Misra-e-Hazrat-e-Chishti Mein Nihaan Hain Zahra
Dein Hai Shabir Tu Shabir Ki Maa Hain Zahra
Haq Ki Tableeg Ke Paigham Mein Kya Rakha Hai
Yeh Jo Hat Jaein Tu Islam Mein Kya Rakha Hai
Lab-e-Paighamber-e-Aakhir Ka Wazifa Zahra
Chashm-e-Quraan Se Jo Dekho Tu Sahifa Zahra
Ismat-o-Iffat-o-Hikmat Ka Khazina Zahra
Abad-o-Mabood Ke Mabain Wasila Zahra
Uss Waseelay Ki Agar Rahnumai Na Mile
Khud Rasolon Ki Duaon Ko Rasai Na Mile
Ishq Tauheed Hai TU Tauheed Ka Irfan Hain Yeh
Ishq Iqrar-e-Nabowat Hai Tu Eqan Hain Yeh
Ishq Hai Khunki-e-Dil Khon Ka Doran Hain Yeh
Ishq Iman Hai Iman Ki Pehchan Hain Yeh
Apne Imaan Ko Tazabzub Se Mubara Na Kiya
Woh Kahin Ka Na Raha Jis Ne Tabara Na Kiya
Farz-e-Tehzeeb-e-Aqeedat Ko Nibhana Warna
Iqra-e-Aya Ki Tarha Sar Ko Jhukana Warna
Azmat-e-Madar-e-Hasnain Batana Warna
Be-Ijazat Dar-e-Zahra Pe Na Aana Warna
Haq Ne Bakhshi Hai Jo Tauqeer Woh Ja Sakti Hai
Malakul Maut Tujhe Maut Bhi Aaskti Hai
Haq Ne Bakhshi Hai Jo Tauqeer Woh Ja Sakti Hai
Wah Kya Dar Hai Dar-e-Bint-e-Shehnsha-e-Ummam
Yeh Sakhawat Yeh Ataein Yeh Shifat Yeh Karam
Yeh Hain Salman-e-Muqadas Woh Suleman-e-Hasham
Yeh Bulandi Yeh Bazurgi Yeh Falak Our Yeh Hum
Sar Jhukate Hain TU Azmat Ka Safar Lagta Hai
Sar Uthate Hain Tu Qosain Se Sar Lagta Hai
Tere Dar Par Tere Hubdar Khare Rehte Hain
Anbiya Oliya Otar Khare Rehte Hain
Haan Mere Jaise Bhi Gunhegar Khare Rehte Hain
Manzil-e-Sidrah Pe Jis Ko Na Jhijakte Dekha
Uss Nabi Ko Teri Dehleez Pe Rukhte Dekha
Muhar-e-Angusht-e-Wilayat Pe Nagina Tera
Malik-e-Mulk Ki Dolat Hai Safina Tera
Tubaton Mein Jo Nehaan Hai Woh Khazina Tera
Karbala Teri Najaf Tera Madina Tera
Riqqa-o-Mashad-o-Kashan-o-Halab Tere Hain
Aasmaan Jitne Zameeno Pe Hain Sab Tere Hain
Hukam Jo De Diya Tu Ne Woh Nibhana Ho Ga
Khud Ko Hasnain(AS) Ka Khaiyat Batana Ho Ga
See Ke Malboos Ko Hasnain(AS) Ke Lana Ho Ga
Tu Ne Jab Keh Diya Rizwan Ko Aana Ho Ga
Tere Aagay Tu Mashiyat Bhi Nahi Chal Sakti
Kuch Bhi Ho Jaye Teri Baat Nahi Tal Sakti
