Wo Khoon Ro Ke Kehta Raha Zamanay Se
Ridaeyn Cheeno Naa Logo Mere Gharanay Se

Sawal-e-Aab Pe Rone Pe Us Ke Sonay Pe
Wo Maartay Thay Sakina Ko Har Bahanay Se

Bulati Kis Tarha Abbas Ko Madad Kay Liye
Wo Berida Thee Jhijhakti Rahi Bulanay Se

Sulaya Jaata Tha Behosh Kar Ke Durron Se
Jagaya Jaata Tha Abid Ko Taaziyane Se

Rida-E-Saani-e-Zehra Mei Dhal Gaya Akbar
Ghubaar Utha Jo Laashon Kay Thar Tharaanay Se

Kuch Isterha Sar-e-Karbobala Wo Ujday Thay
Kay Darr Rahay Hain Abhi Tak Wo Ghar Basaanay Se

Kaha Ye Ganj e Shaheedan Mei Baap Kay Sar Nay
Mujhe Sakina Bulati Hai Qaid Khaanay Se

Poet: Hussain Akbar

Soz: Asghar Abbas Khan

Matami Sangat: Guldasta-e-Jafferia Lahore