Zahra Ke Ghar Mein Haye Qiyamat Ka Wo Samaan
Meyyat Ali Ki Rakhi Thi Lipti Thi Betiyan
Zainab Kafan Ko Thaam Ke Leti Thin Hichkiyan
Zainab Ke Paas Aake Hasan Ne Ki Yeh Fighaan
Janaaze Ko Uthana Hai, Kafan Ab Chhod Do Zainab
Utho Zainab Karo Himmat
Karo Baba Ko Ab Rukhsat
Qiyamat Ka Yeh Sadma Hai Kafan Ab Chhod Do Zainab
Pidar Ki Jaan Mein Hi Betiyon Ki Jaan Hoti Hai
Judaai Baap Ki Sehna Kahan Aasaan Hoti Hai
Ae Meri Ghamzada Khwahar
Mujhe Maaloom Hai Tum Par
ohot Mushkil Yeh Lamha Hai Kafan Ab Chhod Do Zainab
Janaaza Leke Baba Ka Humein Jaane Do Ab Ghar Se
Kaheen Ro Ro Ke Is Gham Mein Rida Gir Jaaye Na Sar Se
Sambhalo Ae Behan Khud Ko
Tumhare Haal Par Dekho
Mera Abbas Rota Hai Kafan Ab Chhod Do Zainab
Humein Ab Zindagi Bhar Is Yateemi Ka Hai Gham Sehna
Bohot Mushkil Se Baba Ka Ruka Hai Khoon Ae Behna
Ajab Aalam Hai Ghurbat Ka
Ibn e Muljim Ki Zarbat Ka
Abhi Tak Zakhm Taaza Hai Kafan Ab Chhod Do Zainab
Khadija Aur Raqayya Fatima Kulsum Ko Dekho
Badi Ho Tum Karo Himmat Sambhalo Chhoti Behnon Ko
Imaame Se Koi Lipte
Koi Lipte Musalle Se
Hamara Saath Dena Hai Kafan Ab Chhod Do Zainab
Woh Dekho Dar Pe Jo Baithe Hain Unko Kaun Paale Ga
Batao Kaun Kufa Ke Yateemon Ko Sambhale Ga
Yeh Baba Ki Wasiyat Thi
Khabar Lena Yateemon Ki
Unhein Bhi Chup Karana Hai Kafan Ab Chhod Do Zainab
Janaaze Ke Barabar Mein Khadi Hain Fatima Zahra
Kafan Hat Jaaye Na Sar Se, Dikhe Na Zakhm Zarbat Ka
Madine Mein Saha Jo Jo
Abhi Bhooli Kahan Hain Woh
Wohi Pehlu Shikasta Hai Kafan Ab Chhod Do Zainab
Yeh Phir Shabbir Se Shabbir Ne Ro Ro Kar Kaha Bhai
Tumhi Zainab Ko Do Apne Kafan Ka Wastah Bhai
Dikha Kar Maa Ka Woh Kurta
Bata Do Roz e Ashura
Kafan Mujhko Pehnana Hai Kafan Ab Chhod Do Zainab
Ajab Kahraam Tha Ghar Mein Yeh Jab Bola Hai Zainab Ne
Abhi Baba Ko Jee Bhar Ke, Kahan Dekha Hai Zainab Ne
Hasan Kehne Lage Ro Ke
Kaha Jitni Dafa Tum Ne
Kafan Main Ne Hataya Hai Kafan Ab Chhod Do Zainab
Uthayi Jis Ghadi Mayyat Jawaan Beton Ne Kandhon Par
Bayaan Ho Kaise Yeh Manzar Yeh Gham Ka Kaunsa Manzar
Yeh Dil Gham Se Na Phat Jaaye
Yahi Kehte Hue Haaye
Janaaza Ghar Se Nikla Hai Kafan Ab Chhod Do Zainab
