Akbar Ne Sina Khai Hai Unko Na Batana
Baba Phuphi Amma Se Mera Zakhm Chupana
Kis Tarhan Se Dekhein Gi Wo Hum Dono Ki Ghurbat
Wo Roye To Aa Jaye Gi Khaimo Main Qayamat
Main Zakhm Chupa Leta Hoon Tum Ansoon Chupana
Tasweer E Muhammad Hai Bare Nazo Se Paali
Mar Jaye Na Khaimo Main Meri Palny Wali
Hargiz Ye Mera Hath Na Seeny Se Hatana
Mari Hai Sina Seny Pe Ye Keh Ke Laeen Ne
Phoolon Ki Tarhan Pala Hai Akbar Ko Phuphi Ne
Lashy Pe Abaa Kahimoon Se Pehle Hi Udhana
Is Baar Shahadat Ko Utha Le Gi Imamat
Bhai Se Chupana Nahi Ek Bhai Ki Ghurbat
Sajjad Ko Tafseel Shahadat Ki Sunana
Mamta Unhein Lashy Pe Mere Laye Gi Baba
Be Sakhta Wo Mujh Se Lipat Jaye Gi Baba
Mumkin Ho Tu Lashy Se Unhein Door Hatana
Ju Khak Bhari Hai Mere Balon Se Chura Do
Chehre Pe Laho Hai Mere Daman Se Hata Do
Wo Zidd Ju Zyada Kary Bas Chehra Dekhana
Yoon Naiza Sitam Gaar Ne Mara Mere Baba
Pehlo Bhi Shikasta Hai Hamara Mere Baba
Yaad Aay Ga Dadi Ka Unhein Zakhm Purana
Is Haal Main De Sabr Khuda Bint E Ali Ko
Akbar Ka Salam Akhri Keh Dena Phuphi Ko
Zinda Bara Mushkil Hai Mera Khaime Main Jana
Har Baat Meri Apki Behno Ke Liye Hai
Bas Ek Wasiyat Hai Meri Sughra Ke Liye Hai
Laa Kar Khat E Sughra Mere Lashy Pe Sunana
Dam Todte Akbar Ko Na Pohanche Koi Sadma
Muh Pher Ke Yoon Rote Ho Maloom Hai Baba
Par Samny Sadaat Ke Ansoon Na Bahana
Us Akhri Hichki Me Taqallum Hoa Mehshar
Ary Akbar Ne Kaha Hath Ju Peshani Pe Rakh Kar
Loo Hum Ko Ijazat Do Hamein Door Hai Jana
