Akbar Ko Maar Dala Ye Jab Ran Main Shor Utha
Laashe Pe Aa Ke Rone Lage Shah e Karbala
Dil Mein Sinaan Thi Aur Badan Tha Kata Hua
Bete Ka Haal Dekha Tu Sambhla Nahin Gaya
Akbar Ki Laash Par Gire Kehte Hue Hussain
Kya Haal Mere Chaand Se Bete Ka Ho Gaya
Tum Ne Bhari Jawani Main Khayi Hain Barchiyan
Akbar Ko Maut Aa Gayi Kaise Sune Gi Maa
Rakhti Thi Jisko Ghar Main Bhi Laila Naqab Main
Kis Ki Nazar Lagi Mera ye Laal Mar Gaya
Milte Nahin The Tum Mujhe Ayy Mere Naujawan
Main Is Liye Bhi Aaya Hon Ghutnon Ke Bal Yahan
Rakh Rakh Ke Hath Lashon Pe Dhonda Tera Badan
Beta Tumhara Gham Meri Benayi Le Gaya
Allah Kitne Zakhm Hain Akbar Ke Jism Par
Talwaren Sab Ne Mari Hain Ye Bol Bol Kar
Akbar Ko Maar Do Khud He Mar Jayega Hussain
Bhoolunga Kis Tarah Ye Laeeno Ka Bolna
Bole Hussain Dekh Ke Tooti Hui Sina
Zaalim Ne Mere Sabr Ka Lena Tha Imtihan
Ye Keh Ke Barchhi Tori Hai Ibn e numair Ne
Niklegi Jab Ye Barchi Kaleja Bhi Aayega
Shayad Kisi Ne Gurz Bhi Mara Hai Kheench Kar
Sehra Main Kaise Bandhunga Zakhmi Hai Tera Sar
Atharhwain Baras Main He Jaata Hai Chor Kar
Dulha Tujhe Banaaun Ye Armaan Reh Gaya
Shana Hila Hila Ke Ye Bole Shah e Zaman
Mayyat Na Apne Bhai Ki Dekhe Koi Behan
Sughra Watan Main Reh Gayi Acha Hua Magar
Lasha Tera Sakina Se Kaise Chupaunga
Akbar Ki Zakhmi Laash Se Lipte Hue Wahin
Zainab Na Sath Detin Tu Mar Jate Shah e Deen
Haye Kisi Bhi Baap Pe Aye Na Ab Kabhi
Maula Pe Jaisa Waqt Tha Zeeshan Aur Raza
