Betiyan Thi Janaza Tha Ehsaas Tha
Dur Baba Ki Mayyat Se Abbas Tha
Waqt E Rukhsat Kafan Jab Hataya Gaya
Aakhiri Bar Chehra Dikhaya Gaya
Apne Abbas Ka Jab Khayal Aa Gaya
Deke Awaz Shabbir Ne Ye Kaha

Abbas Aao Baba Ko Rukhsat Karo
Aaj Baazu Bhi Hain Aur Janaza Bhi Hai
Aao Baba Ko Rukhsat Karo

Jab Se Baba Ne Choome Hain Shaane Tere
Karbala Yaad Aati Hai Bhai Mujhe
Aik Zakhmi Badan Hoga Jab Be Kafan
Kon Aaye Ga Bhai Uthane Usay
Aaj Sab Hain Chalo Tum Mera Saath Do
Dur Betho Na Ab Mere Ghazi Utho

Janta Hoon Bohot Sabr Tum Ne Kiya
Apne Baba Ke Qatil Ko Paani Diya
Zakhm Gehra Hai Ab Bhi Shakista Hai Sar
Usne Talwar Se War Aisa Kiya
Zarb Ke Zakhm Se Khoon Phir Na Bahe
Dekho Mayyat Rakhi Hai Bahot Der Se

Jaise Amma Ne Mujh Ko Bulaya Suno
Tum Bhi Baba Ko Ek Bar Awaz Do
Maa Ki Tarhan Se Band E Kafan Tor Kar
Apne Seene Se Tum Ko Laga Lein Ge Wo
Unka Ehsaas Ho Tum Tou Abbas Ho
Mere Baba Ke Dil Ke Bahot Paas Ho

Bas Ye Arman Hota Hai Har Baap Ka
Mere Bete Uthaye Janaza Mera
Keh Ke Ye Baat Shabbir Rone Lage
Aur Phir Haath Seene Pe Rakh Kar Kaha
Aisa Na Ho Kabhi Baap Uthaye Koi
Apne Kandhe Pe Mayyat Jawan Laal Ki

Yaad Hai Tum Ko Baba Ne Jaate Hue
Haath Rakha Tumhara Mere Haath Pe
Tum Ko Shab Ki Namazon Mein Manga Gaya
Aye Mere Bhai Karbobala Ke Liye
Kya Ye Sadma Hai Kam Hain Yateem Aaj Hum
Haye Aaghaz E Karbobala Hai Ye Gham

Thaam Kar Apni Tooti Hui Pasliyan
Dekho Baba Ke Pehlu Mein Bethi Hain Maa
Haye Ghurbat Wohi Haath Pehlu Pe Hai
Taziyano Ke Jis Par Hain Ab Bhi Nishan
Dekho Aye Ba Wafa Saath Hain Mustafa
Chal Ke Baba Ko Ab Bol Do Alwida

Dekho Baba Ki Mayyat Se Lipti Hai Wo
Tum He Zainab Ke Jeene Ki Umeed Ho
Bhai Shabbar Ne Rukh Se Hataya Tha Jo
Apne Haathon Se Tum Wo Kafan Baandh Do
Aks E Khyber Shikan Mar Na Jaye Behan
Tum Ko Dekhe Gi Tou Chor De Gi Kafan

Baat Behano Ki Ayi Tou Ghazi Uthe
Apne Baba Ki Mayyat Ki Janib Chale
Aake Baba Ke Qadmon Ka Bosa Liya
Aye Raza Haal Zeeshan Kaise Likhe
Jab Janaza Utha Ghar Mein Kohram Tha
Ro Ke Abbas Ne Bhaiyo Se Kaha