Chacha Main Apki Turbat Banane Aya Hoon
Sakina Ab Bhi Hai Pyaasi Batane Aya Hoon
Batau Kaise Chacha Kya Guzar Gayi Hum Par
Har aik Shehr Mein Maare Gaye Humein Pathar
Thi Maaein Phuphiyan Mere Saath Aye Ali Ke Pisar
Ye Sare Zulm Ke Kisse Sunane Aya Hoon
Haram Ko Chor Ke Kufe Se Aa Raha Hoon Chacha
Bata Gaye Hain Tumhari Wasiyatein Baba
Wahin Ho Qabr Chida Tha Jahan Pe Mashkiza
Kiya Tha Sheh Se Jo Wada Nibhane Aya Hoon
Hai Teen Roz Se Laashe Pe Dhoop Ka Saya
Ye Haal Dekh Ke Rota Hai Khoon Dil Mera
Ghareeb Hoon Main Kafan Tum Ko De Nahi Sakta
Tumhari Laash Ke Tukre Uthane Aya Hoon
Sakina Raah Mein Naake Se Gir Gayi Thi Abhi
Wahin Hai Taaza Riwayat Kamar Pe Likkhi Hui
Hai Jaari Khoon Jo Is Waqt Ayriyon Se Meri
Laeen Se Kha Ke Abhi Taziyane Aya Hoon
Tumhare Samne Ati Hai Sharm Kehte Hue
Ye Baat Karta Bhala Kaise Samne Unke
Abhi Hai Dur Yahan Se Bani Asad Wale
Phuphi Ki Chin Gayi Chadar Batane Aya Hoon
Laeen Ne Bachi Ke Gohar Ko Aise Cheena Tha
Giri Zameen Pe Sakina Main Khoon Rota Tha
Wo Jis Zameen Pe Kanton Se Khoon Tapka Tha
Wo Khaak Rakhne Tumhare Sirhane Aya Hoon
Baghair Inke Tum Utre Thy Zeen Se Kaise
Haram Tou Lut Gaye Ye Baazu Kat Gaye Jab Se
Pare Thy Dur Ye Laashe Se Apke Kab Se
Kate Ye Baazu Badan Se Milane Aya Hoon
Bana Ke Qabr Takallum Wo Bola Ro Ro Kar
Yahan Pe Ayenge Ab Zaireen Shaam O Sahar
Jale Khayam Ki Rakh Kar Lahad Pe Khaak Magar
Main Pehla Farsh Azaa Ka Bichane Aya Hoon
