Hussain Bant Rahe Hain Nijaat Le Jao
Kuch Ansoun Ke ewaz Kainat Le Jao

Ye Karbala Hai Ye Mojiz Numa Ki Basti Hai
Kafan Main isKe Lapaito Hayat Le Jao

Kahein Ge Matami Halkon Se Log Mehshar Main
Humein Hussain Ki Jannat Main Sath Le Jao

Nahi Karun ga Lahad Main Main Intezar e Sahar
Farishto Karbobala Raat o Raat Le jao

Qasam Hussain Ki Purse Main Kam He Lagta Hai
Buland Jitna Bhi Matam Main Hath Le jao

Kaha Ye Khizr Se Abbas Ne Yahan Aakar
Humari Mashq Se Aab e Hayaat Le Jao

Aye Mojon Utho Areeze Ko Sath Le Jao
Imam Asr Talak Meri Baat Le Jao

Khuda Utarne Wala Hai Sadqa Mehdi Ka
Rasoolon Aao Naye Mojzat Le Jao

Kahein gi Fatima Waqt e Zahoor Mehdi Se
Larayi Ke Liye Ghazi Ko Sath Le Jao

Gham e Hussain Main Har Zakhm Mojza Hai Naeem
Saja Ke Jism Pe Kuch Mojzat Le Jao