Qatl Ali Ho Gaye Ramzan Main
Dard Hai Jibreel Ke Ailaan Mein

Masjid E Kufa Se Jab Ghum Ki Ye Aayi Khabar
Bint E Ali Ro Pari Seena O Sar Peet Kar
Kufe Mein Ek Shoar Tha Ya Ali Ya Aeliya
Ho Gaya Matam Bapa Ya Ali Ya Aeliya
Kis Ne Ye Dhaai Jafa Ya Ali Ya Aeliya
Ghum Hai Bapa Khana E Yazdaan Mein

Shabbar O Shabbir Se Behno Ne Rokar Kaha
Dekho Tu Ja Kar Zara Kyu Hai Ye Aah O Buka
Aati Hai Har Su Sada Ya Ali Ya Aeliya
Ghum Hai Ye Sab Se Bara Ya Ali Ya Aeliya
Haye Ghazab Ho Gaya Ya Ali Ya Aeliya
Hashr Bapa Hai Dil E Viraan Mein

Daur Ke Masjid Gaye Shabbar O Shabbir Jab
Baap Ko Is Haal Mein Dekha Ke Haaye Ghazab
Beto Ne Ro Kar Kaha Ya Ali Ya Aeliya
Kyun Huye Hum Se Khafa Ya Ali Ya Aeliya
Khoon Jo Baha Aapka Ya Ali Ya Aeliya
Deen E Mohammad Bhi Hai Nuqsaan Mein

Baap Ko Le Kar Gaye Ghar Mein Jo Dono Pisar
Pairo’n Main Baithi Koi Koi Sambhale Thi Sar
Fizza Ki Aayi Sada Ya Ali Ya Aeliya
Jab Se Ye Sadma Mila Ya Ali Ya Aeliya
Dil Ka Sukoo’n Lut Gaya Ya Ali Ya Aeliya
Sang Hai Ya Dil Seena E Insaan Main

Kufe Ke Bewa Yateem Parhte Hain Ye Marsiya
Koi Sahara Nahi Maula Tumhare Siwa
Ab Ye Musibat Zada Ya Ali Ya Aeliya
Kaise Jiyenge Bhala Ya Ali Ya Aeliya
Aap The Ghum Ki Dawa Ya Ali Ya Aeliya
Nauha Hai Ye Shehar E Bayabaan Mein

Nauha Hai Kulsoom Ka Kis Se Main Puchu Bhala
Kyun Bin E Muljim Ne Ki Baba Ye Tum Par Jafa
Jurm Na Koi Khata Ya Ali Ya Aeliya
Zulm Ki Hai Inteha Ya Ali Ya Aeliya
Kunba Tarapne Laga Ya Ali Ya Aeliya
Khaak Hai Balon Main Garebaan Mein

Rehmaton Aur Barkaton Wala Maheena Ye Tha
Jis Mein Mere Baba Ka Khoon Bahaya Gaya
Rehmatain Mehwe Buka Ya Ali Ya Aeliya
Barkatian Mehwe Buka Ya Ali Ya Aeliya
Nematain Mehwe Buka Ya Ali Ya Aeliya
Bughz Jo Tha Qalb E Musalman Main

Mazhar O Mesum Ne Ye Keh Ke Uthaya Qalam
Eid Se Pehle Mila Aal E Muhammad Ko Ghum
Bibiyo’n Ka Marsiya Ya Ali Ya Aeliya
Aaj Se Hai Ibteda Ya Ali Ya Aeliya
Imtehaan E Karbala Ya Ali Ya Aeliya
Nauha Hai Maula As Ke Yateemaan Main