Roze Pe Mustafa Ke Udaasi Si Chayi Hai
Kunbe Ko Khoke Zainab E Nashaad Aayi Hai
Ary Rokar Pukari Nana Main Faryaad Laayi Hon
Main Chor Kar Hussain Ko Jungle Mein Aayi Hon
Nana Ajeeb Sanaye Humpar Guzar Gaye
Ranjo Alam Ne Gher Liya Hum Jidhar Gaye
Nana Khuda Ke Ghar Me Na Humko Amaa’n Mili
Bhai Ne Sheher Chor Jungle Ki Raah Li
Nana Hamare Ghar Ka Sab Asbaab Lut Gaya
Nana Hamare Sar Pe Na Baaqi Rahi Rida
Nana Hazaar Tarha Jafa Ki Laeeno Ne
Khaimon Main Haaye Aag Laga Di La’eeno Ne
Nana Shaheed Hogaye Bhai Ke Jaa Nesar
Ek Ek Kar Ke Mar Gaye Ashaab Zee Weqaar
Nana Bala Ke Bann Me Qayamat Ka Rann Pada
Bhai Se Bhai Baap Se Beta Bichad Gaya
Nana Zameen Karbobala Laal Hogayi
Qasim Ki Laash Ghodo’n Se Pamaal Hogayi
Nana Katake Shaano Ko Abbas Margaye
Ghurbat Main Bhaijaan Ko Be Aas Kar Gaye
Nana Aseer Bara The Aur Ek Thi Rasan
Bandhe Gaye The Misle Gunahgaar E Khastatan
Nana Hum Apne Haal Pe Rote The Baar Baar
Nana Hamarae Haal Pe Haste The Badd Sheyaar
Itne Main Ek Shaami Ne Nana Ghazab Kiya
Saydani Ko Kaneezi Main Usne Talab Kiya
Hoti Thi Laakh Zillate Hum Dekhte Rahe
Has Has Ke Taaziyane Sitam Jhelte Rahe
Nana Tabaah Hoke Hum Aaye Hai Shaam Se
Ek Daaghe No Sakina Ka Laaye Hai Shaam Se
Ab Tak Hai Neel Rassi Ke Shaano Ko Dekhlo
Nana Hamare Tann Pe Nishano Ko Dekhlo
Zainab Jo Roke Karti Thi Qabr E Nabi Pe Bayn
Tharra Raha Tha Roza E Sultan E Mashraqayn
Bus Khatm Kar Nisaar Ye Ghum Naak Daastaan
Roye Hai Is Alam Mein Zameen Aur Aasmaa’n
