Reh Gayin Tanha Betiyan Baba
Haye Kufa Shehar Main
Utho Baba Main Zainab Hoon Ye Bibi Ki Sada Hogi
Mere Mola Ali Ko Jis Ghari Ayi Qaza Hogi

Nahi Kyun Bolte Baba Bulati Hai Tumhe Zainab
Ke Sare Dard Ghurbat Ke Sunati Hai Tumhe Zainab
Tumhare Baad Sar Pe Ab Yateemi Ki Rida Hogi

Abhi Tou Maa Ke Sadme Se Na Bachon Ko Sukoon Aya
Ke Teri Maut Ne Phir Se Humare Dil Ko Tarpaya
Yun Lagta Hai Ke Ab Hum Pe Sitam Ki Inteha Hogi

Ali Ki Laash Pe Kulsoom Ye Ro Ro Ke Farmaye
Kya Us Beti Ka Jeena Hai Ke Jiska Baap Mar Jaye
Ye Sun Kar Bain Dukhtar Ka Tarapti Syeda Hongi

Ba Roz E Eid Kalimgo Bahot Khushiyan Manaein Ge
Tumhare Gham Main Hum Baba Magar Aansu Bahaein Ge
Batao Eid Kya Baba Yateemon Ki Bhala Hogi

Rida Sar Pe Nahi Hogi Sharabi Hum Safar Honge
Sina Ki Nok Pe Baba Tumhare Sab Pisar Honge
Jahan Bhi Jaye Gi Zainab Wahan Pe Karbala Hogi

Kabhi Aale Muhammad Ke Nahi Gham Ko Bhula Sakte
Hai Jab Tak Dard Seeno Main Nahi Eidein Mana Sakte
Ba Roz E Eid Bhi Mohsin Humare Ghar Azaa Hogi