Dushman Ko Bhi Maloom Tha Sarwar Ka Jahan Hai
Hum Shakl e Payambar Hai Ye Shabbir Ki Jaan Hai
Aapas Main Kar Rahe The Sitamgar Ye Mashwara
Sarwar Ko Maarna Hai To Akbar Ko Maar Do
Marna Hai Is Jawan Ka Marna Hussain Ka
Sarwar Ko Maarna Hai To Akbar Ko Maar Do
Kaante Pare Hain Pyaas Se Iski Zabaan Par
Lekin Taras Na Khaiyo Sarwar Ki Jaan Par
Peechhe Se Chhup Ke Waar Karo Is Jawan Par
Hoga Ye Waar Muttalabi Khandan Par
Bach Kar Na Jaane Paaye Ye Tasveer e Mustafa
Aage Barho Rasool Ki Kheti Ujaad Do
Naiza Jawan Laal Ke Seene Mein Gaar Do
Zahra Ke Aur Ali Ke Kaleje Ko Phaad Do
Jaldi Karo Hussain Ki Saansein Ukhaar Do
Mar Jaayenge Hussain Agar Ye Juda Hua
Sabr O Raza Ki Had Se Guzar Jaayenge Hussain
Lekin Pisar Ka Daagh Na Seh Paayenge Hussain
Aisa Jigar Kahaan Se Bhala Laayenge Hussain
Akbar Ki Laash Dekh Ke Mar Jaayenge Hussain
Un Ko Shikast Dene Ka Hai Ek Raasta
Humshakl e Mustafa Hai Niraala Hai Ye Jawan
Ye Bhi Rahe Khayaal Ke Aala Hai Ye Jawan
Zahra Ke Pure Ghar Ka Ujala Hai Ye Jawan
Bint e Ali Ki God Ka Paala Hai Ye Jawan
Is Naujawan Main Hai Basa Dil Hussain Ka
Athaara Saal Paal Ke Jis Ko Jawan Kiya
Wo Dilbar e Hussain Hai Humshakl e Mustafa
Ek Baap Ke Liye Hai Ye Sadma Bohat Bara
Bete Ka Sehra Dekh Na Paayen Shah e Huda
Inaam Tum Yazid Se Lena Bohat Bara
Chaaron Taraf Se Gher Ke Maaro Ise Sina
Dil Tak Jo Jaaye Tor Ke Akbar Ki Pasliyan
Dekhen Jo Zakhm Shah Tu Nikle Badan Se Jaan
Ho Jaayen Iss Diyaar Main Be Aas Be Amaan
Akbar Ke Baad Jee Nahin Sakte Shah e Huda
Yawar Koi Nahin Hai Woh Kis Ko Bulayenge
Tanha Hussain Laasha e Akbar Pe Aayenge
Jab Apne Naujawan Ko Zinda Na Payenge
Khud Maut Ko Hussain Gale Se Lagayenge
Khanjar Ko Saunp Denge Woh Sookha Hua Gala
Sarwar Ko Ek Pal Na Sukoon Aur Qaraar Do
Iss Sakht Imtihaan Se Sheh Ko Guzaar Do
Pusht e Faras Se Khaak Pe Iss Ko Utaar Do
Barchhi Uthao Seena e Akbar Pe Maar Do
Tukre Kaleja Hoga Isi Gham Se Dekhna
Maqtal Ki Simt Daurte Jaate Rahe Hussain
Aankhon Se Khoon Ke Ashk Bahaate Rahe Hussain
Girte The Jab Tu Khud Ko Uthaate Rahe Hussain
Ro Ro Ke Ye Sada Bhi Lagaate Rahe Hussain
Abbas Fauj e Shaam Ka Nara Suno Zara
Waiz Bhi Ashkbaar Hai Mesum Bhi Noha Gar
Mazhar Bhi Ro Raha Hai Hussain e Ghareeb Par
Sun Kar Bayan Ye Rota Hai Surani Har Bashar
Baithe Laeen Chain Se Akbar Ko Maar Kar
Lekin Fiza Main Goonj Rahi Thi Yahi Sada
