Sajjad Main Zainab Hoon Mere Sar Pe Rida Koi Nahi Bazar E Jafa
Majma Hai Kufiyon Ka Mere Chalne Ki Jaa Koi Nahi Bazar E Jafa
Sajjad Mere Sar Se No Bar Chinni Chadar
Balwe Main Nabi Zadi Phirwayi Gayi Dar Dar
Mil Jaye Rida Mujh Ko Aur Meri Dua Koi Nahi Bazar E Jafa
Sajjad Chalun Kaisa Lakho Hain Tamashayi
Yaad Aata Hai Reh Reh Ke Abbas Mera Bhai
Faryad Karun Kis Se Ab Tere Siwa Koi Nahi Bazar E Jafa
Sajjad Mere Dil Ko Ye Dard Satata Hai
Sar Ghazi Ka Naize Se Jab Khak Pe Aata Hai
Sar Mera Khula Dekhe Gham Is Se Bara Koi Nahi Bazar E Jafa
Maloom Hai Aada Ko Ghazi Ki Behan Hoon Main
Bedast Hai Wo Ghazi Paband E Rasan Hoon Main
Yaad Aayi Wafa Us Ki Jab Pass Raha Koi Nahi Bazar E Jafa
Sajjad Teri Halat Dekhi Nahi Jati Hai
Be Parda Mujhe Dekhe Ye Baat Rulati Hai
Sajjad Teri Tarhan Kanton Pe Chala Koi Nahi Bazar E Jafa
Jata Hai Suwe Zindan Ab Kunba Muhammad Ka
Rassi Main Bandhe Qaidi Kanton Se Bara Rasta
Ummat Ne Sitam Dhaaye Qismat Se Gilla Koi Nahi Bazar E Jafa
Maut Aaye Gi Zindan Main Meri Bali Sakina Ko
Kya Jaa Ke Bataon Gi Bimar E Madina Ko
Gham Dil Pe Uthane Ko Ab Baqi Bacha Koi Nahi Bazar E Jafa
Bazar E Sitam Main Tha Zainab Ka Ajab Aalam
Aye Safdar O Mazhar Ye Zalim Ne Kaha Jis Dam
Hai Kon Tera Waris Zainab Ne Kaha Koi Nahi Bazar E Jafa
